பாகிஸ்தான் பரிதாப தோல்வி ! ! வீடியோ மற்றும் அலசல்

இன்று நடந்த உலகக்கோப்பை போட்டியில் பாகிஸ்தான் 54 ரன்கள் வித்தியாசத்தில் மேற்கிந்தியத்தீவுகளிடம் பரிதாபமாக தோற்றது.







9வது உலகக்கோப்பையின் முதல் போட்டி இன்று ஜமைக்காவில் உள்ள சபினா பார்க் மைதானத்தில் நடந்தது. டாஸில் ஜெயித்த இண்சமாம் மேற்கிந்தியத்தீவுகளை பேட் செய்யுமாறு கேட்டுக்கொண்டார். இந்த உலகக்கோப்பையின் முதல் பந்தை பாகிஸ்தானின் உமர் குல் வீசினார். கிறிஸ் கேல் அதை மிட்-விக்கெட் பகுதிக்கு தட்டி ஒரு ரன் எடுத்தார். தொடக்கம் முதலே தடுமாற்றத்துடன் விளையாடிய கேல் 6 பந்துகளில் 2 ரன் எடுத்திருந்த பொழுது, 3வது ஓவரில் குல்லின் ஆஃப்-சைடில் அளவு குறைவாக விழுந்து வெளியே ஸ்விங்காகி சென்ற பந்தில் கீப்பரிடம் கேட்ச் கொடுத்து அவுட்டானார். அவரையடுத்து களமிறங்கிய சர்வான் முதல் பந்திலேயே ஸ்லிப்பில் நின்றிருந்த யூனிஸ்கானிடம் கேட்ச் கொடுத்தர். மிகச் சுலபமான கேட்சை யூனிஸ் தவறவிட்டார். அந்த கேட்ச் பிடிக்கப்பட்டிருந்தால் ஆட்டத்தின் போக்கு மறியிருக்கக் கூடும். அதன் பின் சந்தர்பாலும் சர்வானும் ஜோடி சேர்ந்து ஆடினர். ஒருமுனையில் சர்வான் பந்தை பவுண்டரிக்கு விரட்டிக்கொண்டிருக்க மறுமுனையில் சந்தர்பால் மிகவும் பொறுமையாக ஆடினார். அதனால் அணியின் ரன்ரேட் மிக குறைவாகவே இருந்தது. 20வது ஓவரில் இஃப்திகரின் பந்தில் கீப்பர் அக்மலிடம் கேட்ச் கொடுத்து சந்தர்பால் அவுட்டானார். அவர் மிக மெதுவாக் விளையாடி 63 பந்துகளில் 19 ரன்கள் மட்டுமே எடுத்தார். அப்பொழுது அணியின் ஸ்கோர் 20 ஓவர்களில் 64 மட்டுமே. அதன் பின் 24வது ஓவரில் சர்வானும் ஸ்லிப்பில் கேட்ச் கொடுத்து அவுட்டாகி திரும்பினார். அவர் 65 பந்துகளில் 49 ரன்கள் எடுத்திருந்தார்.









24 ஓவர்களில் 77/3 என்ற மோசமான் நிலையில் லாரவுடன் சாமுவேல்ஸ் ஜோடி சேர்ந்தார். அதன் பின் ஆட்டம் சூடு பிடித்தது. சாமுவேல்ஸ் அதிரடியாக ஆடி அணியின் ஸ்கோரும், ரன்ரேட்டும் உயர வழி செய்தார். இருவரும் சேர்ந்து 16 ஒவர்களில் 91 ரன்கள் சேர்த்தனர். மேற்கிந்திய அணி சொற்ப ரன்களுக்கு மீண்டும் ஆட்டமிழக்கும் என்ற நிலையில் இருந்து சுதாரித்து ஆடத்தொடங்கியது. அணியின் ஸ்கோர் 168ஆக உயர்ந்த பொழுது ஹஃபீஸின் பந்தை லாரா ஸ்வீப் செய்ய முயன்று கீப்பரிடம் கேட்ச் கொடுத்து ஆட்டமிழந்தார். அவரை தொடர்ந்து சாமுவேல்ஸும், ராம்தினும் அவுட்டாகி திரும்பினர். லாரா 37 ரன்களும் சாமுவேல்ஸ் 63 ரன்களும் அடித்தன்ர். பின்னர் களமிறங்கிய ஸ்மித் அதிரடி ஆட்டம் ஆடினார். 15 பந்துகளில் மூன்று பவுண்டரிகள் 2 சிக்ஸ்களுடன் 32 ரன்கள் அடித்தார். மற்றொரு ஆட்டக்காரரான் ப்ரேவொ 17 பந்துகளில் 16 ரன்கள் அடித்தார். இவர்கள் இருவரின் முயற்சியால் மேற்கிந்தியத்தீவுகள் அணி 50 ஓவர்களில் 241 எனற கெளரவமான் ஸ்கோரை அடித்தது. கடைசி பத்து ஓவர்களில் 85 ரன்கள் அடிக்கப்பட்டது. குறிப்பாக கடைசி 5 ஓவர்களில் 57 ரன்கள் அடித்தனர்.






பாகிஸ்தானின் இஃப்திகர் அஞ்சும் 10 ஓவர்களில் 44 ரன்கள் கொடுத்து 3 விக்கெட்களை வீழ்த்தினார். அடுத்தபடியாக் உமர் குல் மற்றும் ஹஃபீஸ் தலா 2 விக்கெட்டுகளை வீழ்த்தினர். பாகிஸ்தான் மொத்தம் 11 உதிரிகளை விட்டுக்கொடுத்தது. சர்வானின் தவற விடப்பட்ட கேட்ச் ஆட்டத்தின் திருப்புமுனையாக அமைந்தது.

50 ஓவர்களில் 242 ரன்கள் எடுத்தல் வெற்றி என்ற இலக்கோடு களமிறங்கியது பாகிஸ்தான். பவல் வீசிய முதல் ஓவரின் இரண்டாவது பந்தை ஸ்கொயர்-லெக் திசையில் ஸிக்ஸ் அடித்து இம்ரன் நசீர் தனது கணக்கையும் அணியின் கணக்கையும் துவக்கினார். துரதிர்ஷ்டவசமாக அடுத்த பந்திலேயே ட்ரைவ் செய்ய முயன்று கீப்பர் ராம்தினிடம் கேட்ச் கொடுத்து அவுட்டானார். 4வது ஓவரில் அணியின் ஸ்கோர் 17ஆக இருந்தபொழுது, உயரம் அதிகமாக வந்த பந்தை ஹுக் செய்ய முயன்று கீப்பரிடம் கேச் கொடுத்து பெவிலியனுக்கு திரும்பினனர் யூனிஸ்கான். அவர் 13 பந்துகளில் 9 ரன்கள் எடுத்திருந்தார். அதன்பின் ஜோடி சேர்ந்த யூசுஃபும், ஹஃபீசும் பொறுமையாக ஆடி அணியின் ஸ்கோரை 10 ஓவர்களில் 39 ரன்களாக உயர்த்தினர். தலைக்கு மேல் தூக்கி அடிக்க முயன்று மிட்-ஆனில் கேட்ச் கொடுத்து அவுட்டானர் ஹஃபீஸ். அதன்பின் இண்சமாமும், யூசுஃபும் சேர்ந்து நாலாவது விக்கெட்டுக்கு 60 ரன்கள் சேர்த்தனர். இருந்த போதிலும் அணியின் ரன்ரேட் மிகக்குறைவாகவே இருந்தது. 29 ஓவர்களில் 99 ரன்கள். தேவைப்படும் ரன்ரேட் ஏறக்குறைய 6.7 ஆக இருந்தது. அப்பொழுது அளவு குறைவாக விழுந்து எழும்பி வந்த பந்தை தடுத்தாட முயன்று கீப்பரிடம் கேட்ச் கொடுத்து அவுட்டானர் யூசுஃப்.







அதன்பின் விக்கெட்டுகள் மடமடவென சரிய ஆரம்பித்தன. யூசுஃப் 37 ரன்களும் இண்சமாம் 36 ரன்களும் அடித்தனர். 33 ஓவர்களில் 6 விக்கெட் இழப்பிற்கு 116 ரன்கள் என்ற பரிதாப நிலையில் தத்தளித்தது பாகிஸ்தான். ஒருமுனையில் ஷோஹைப் மாலிக் அடித்து ஆடிய பொழுதிலும் மறுமுனையில் விக்கெட்டுகள் விழுந்தவண்ணம் இருந்ததால் தோல்வியை நோக்கி வேகமாக முன்னேறியது பாகிஸ்தான். 187 ரன்கள் இருந்த பொழுது கடைசி மூன்று விக்கெட்டுகளையும் இழந்து 54 ரன்கள் வித்தியாசத்தில் பரிதாபமாக தோற்றது. மாலிக் 54 பந்துகளில் 62 ரன்கள் அடித்தார். மேற்கிந்தியத்தீவுகளின் ஸ்மித் மற்றும் ப்ரேவோ தலா மூன்று விக்கெட்டுகளை வீழ்த்தினர். 3 விக்கெட்டுகளை வீழ்த்தியது மற்றும் 15 பந்துகளில் 32 ரன்கள் அடித்த காரணத்திற்காக ஸ்மித் ஆட்டநாயகனாக தேர்ந்தெடுக்கப்பட்டார்.




பயிற்சி போட்டிகளின் பொழுது இலக்கின்றி தடுமாறிய மேற்கிந்திய அணி சரியான நேரத்தில் சிறப்பாக ஆடி 2 புள்ளிகளை வென்றுள்ளது. மீதமுள்ள இரண்டு போட்டிகளில் (அயர்லாந்து, ஜிம்பாப்வே) வெற்றி பெற்றால் பாகிஸ்தான் இரண்டாவது சுற்றுக்கு தகுதி பெறும். புது விதிகளின்படி மேற்கிந்திய அணியைவிட புள்ளிகள் குறைவாக இருந்தாலும், தரவரிசைப்படி முன்னிலையில் உள்ளதால் D1 ஆகவே சூப்பர்8 சுற்றுக்கு செல்லும். இருப்பினும் மற்றொரு புது விதியின்படி, முதல் சுற்றில் தகுதிபெறும் மற்றொரு அனிக்கு எதிராக எடுத்த புள்ளிகள் மட்டுமே சூப்பர்8ல் கணக்கில் எடுத்துக் கொள்ளப்படும் என்பதால், மேற்கிந்திய அணி 2 புள்ளியுடனும், பாகிஸ்தான் 0 புள்ளியுடனும் சூப்பர் 8க்கு செல்லும். இது பாகிஸ்தான் அணி அரை-இறுதிக்கு தகுதி பெற பின்னடைவாகவே இருக்கும். இதே காரணத்தால் இந்தியா இலங்கையை ஜெயிக்க வேண்டியது முக்கியமாகும். சூப்பர்8க்கு தகுதி பெற்றாலும், முதல் சுற்றில் பெறும் இவ்விரு புள்ளிகள் அரை-இறுதிக்கு செல்லும் அணிகளை முடிவு செய்வதில் முக்கிய பங்காற்றும்.



விரிவான ஸ்கோர்கார்ட்.




இந்த போட்டியின் வீடியோ தொகுப்பு (Highlights Runtime 1 Hr 17 Mins)





















போட்டிகள் நடைபெறும்பொழுது நேரடியாக(Live) பார்த்து ரசிக்க
இங்கே க்ளிக்கவும்